अस्ट्रेलियन क्यापिटल टेरीटोरीले विद्यार्थी भिसा नीतिमा फेरबदल गरेपछि विद्यार्थीहरु आन्दोलित
अस्ट्रेलियन क्यापिटल टेरीटोरीले विद्यार्थी भिसा नीतिमा फेरबदल गरेपछि विद्यार्थीहरु त्यसको विरुद्धमा उत्रिएका छन् । यो फेरबदलले विद्यार्थीहरुलाई असर परेको भन्दै करिब २ सय जना विद्यार्थी आन्दोलन स्वरुप विधानसभाको परिसरमा भेला भएका थिए ।
शुक्रबार भएको उक्त भेलामा विद्यार्थीहरुले उक्त परिवर्तनले आफूहरुमा परिरहेको असर बारे बोलेका थिए । त्यसको साथै उनीहरुले न्यायोचित निर्णय हुनुपर्ने माग राखेका थिए ।
अस्ट्रेलियन क्यापिटल टेरीटोरीले जुलाई २०१७ मा आफ्नो पेशा राज्यको अकुपेसन लिस्टमा नभएतापनि विद्यार्थीहरुले स्टेट नोमिनेसनको लागि आवेदन दिन सक्ने निती ल्याएको थियो । त्यसको लागि विद्यार्थीकम्तिमा एक वर्षसम्म क्यापिटल टेरीटोरीमा बसेको र स्थानीय शैक्षिक संस्थामा अध्ययन गरेको हुनुपर्ने नियम थियो । गत जुन २९ मा भने राज्य सरकारले अकुपेसन लिस्टमा नभएकाहरुलाई अब पीआर भिसा उपलब्ध नगराइने घोषणा गरेको थियो ।
गत जुलाईमा विद्यार्थीहरुको लागि उपलब्ध गराइएको विशेष अवसरलाई प्राप्त गर्नको लागि अरु राज्यमा पढ्ने धेरै विद्यार्थीहरु क्यानबेरा बसाइ सरे र फेरी क्यानबेराको शैक्षिक संस्थामा पढ्न थाले । तर क्यानबेरा बसेको एक वर्ष हुनै लाग्दा सरकारले निती परिवर्तन गरिदिएपछि धेर विद्यार्थी मारमा परेका छन् ।
त्यसैले विद्यार्थीहरुले नीति फेरिएको घोषणा भएको दिन अर्थात जुन २९ भन्दा अगाडी क्यानबेरामा बसाइ सरेर पढ्न थालेका विद्यार्थीको लागि पूरानो नीति लागु हुनुपर्ने माग गरेका छन् ।
Source : SBS News